2019-05-09 12:28:31

تصميم المواقع المتجاوبة

النهاردة هنتكلم عن RWD : Responsive Web Design

في البداية محتاجين نعرف يعنى إيه Responsive Web Design أو التصميم المتجاوب ؟ هو تصميم صفحات و مواقع الانترنت بحيث تتكيف مع نوع الجهاز اللى المستخدم هيفتح منه الموقع سواء من جهاز كمبيوتر أو تابلت أو موبايل باختلاف أحجامه و ده طبعا ظهر نتيجة للزيادة الكبيرة في أعداد مستخدمى النت عن طريق الموبايل و التابلت مؤخرا (25% من مستخدمى الانترنت بيستخدموه عن طريق الموبايل) و لأن مش من الطبيعى تجاهل 1,9 بليون مستخدم للموبايل و كمان مش من الطبيعى إن كل موقع يتصمم نسخة منه للكمبيوتر و نسخة للموبايل و نسخة للتابلت ظهر التصميم المتجاوب اللى بقدر عن طريقه أصمم نسخة واحدة بس من الموقع قادرة إنها تتكيف مع أي جهاز بإختلاف حجمه و مقاس شاشته ..

طيب ليه محتاج أصمم موقعى بشكل متجاوب ؟ 
-لأن المقولة الشهيرة بتقول "المحتوى هو الملك" و عشان أقدر أخلى أكبر عدد من المستخدمين سواء من الكمبيوتر أو التابلت أو الموبايل يشوفو المحتوى بتاعى و أوصل للهدف منه بشكل أسرع لازم أستخدم تصميم متجاوب مع كل الأجهزة اللى بيستخدموها . 
-عشان أحقق أفضل UX : User Experience و هي إن المستخدم يقدر يدخل الموقع بتاعى في أي وقت و من أي جهاز من غير مايحس بفرق أو أزعجه في انه يعمل zooming مع الأخذ في الاعتبار إن استخدام العميل لموبايله أكبر بكتير من استخدامه لجهاز كمبيوتر هيفتحه مرة او مرتين في اليوم عكس الموبايل اللى ف ايده طول اليوم ! .
-جوجل ! التصميم المتجاوب عامل مهم جدا من عوامل إرضاء جوجل اللى بيفضله و يوصى بيه و بالتالى هعلى ال SEO للموقع .
-تقليل التكلفة .. تصميم و متابعة و إدارة موقع واحد متصمم بشكل متجاوب أفضل و أوفر بكتير جدا من تصميم و متابعة و إدارة أكتر من موقع .. واحد للكمبيوتر و واحد للموبايل و واحد للتابلت و هكذا . 
- التصميم المتجاوب كمان بيساعدك تنتشر بسرعة على الشبكات الإجتماعية اللى أغلب مستخدمينها عن طريق الموبايل و التابلت .